ده‌رباره‌ ‌
ده‌زگای ئایدیا بۆ فیکر و لێکۆڵینه‌وە
دەزگایەکە گرنگیی بە چاپ و بڵاوکردنەوەی کتێب و گۆڤار و نامیلکە و وەرگێڕان و لێکۆڵینەوەی فکری و فەلسەفی و سیاسی دەدات. دامەزراندنی ئەم دەزگایە دەگەڕێتەوە بۆ ساڵی 2004، کە ئەوکات بە یەک گۆڤار (بە ناوی گۆڤاری ئایدیا، کە هەتاوەکو ئێستاش بەردەوامە) دەستیپێکرد، دواتر ئەو گۆڤارە بووە هەوێنی دروستبوونی چەندین گۆڤار و پڕۆژەی دیکە و دواجار هەوێنی دروستبوونی دەزگاکەش. لە ماوەی ئەم چەند ساڵەی پاش دامەزراندنی دەزگای ئایدیا، چەندین قۆناغی جیاجیا بەسەر کار و پڕۆژەکانی دەزگاکەدا هاتووە تا گەیشتووە بە ئەمڕۆ.
ئێستاش دەزگاکە بەردەوامە لە کارکردن و خاوەنی چەندین پڕۆژەیە، لەوانە: (چاپ و بڵاوکردنەوەی کتێب. دەرکردنی 6 گۆڤار، چاپ و بڵاوکردنەوەی نامیلکەی فەلسەفی و توێژینەوەی جیهانی و ...هتد). دەزگای ئایدیا سەرجەم کارەکانی لە ڕێگەی ستافێکی کاراوە و بە کەرەستەیەکی مرۆیی (بە ژمارە کەم و بە توانا زۆر) بەڕێوەدەبات. خاوەنی مۆڵەتی فەرمییە لە وەزارەتی ڕۆشنبیریی حکومەتی هەرێمی کوردستان و لەسەر بنەمای پەیڕەو و پڕۆگرامێکی تایبەت بە خۆی کاروبارە ناوخۆییەکان و پەیوەندییە دەرەکییەکانیشی ڕێکدەخات.
بارەگای سەرەکیی دەزگاکە لە شاری سلێمانییە، بەڵام لە ڕێگەی کتێبخانە و کتێبفرۆشەکانەوە پەیوەندیی بەردەوامی لەگەڵ شار و شارۆچکەکانی دیکەی هەرێمی کوردستان هەیە و بەرهەمەکانی دەگەیەنێت پێیان. بەپێی پێویستیش لەگەڵ ڕێکخراوەکانی دیکە لە شار و شارۆچکەکانی دیکەی کوردستان مەڕاسیمی ڕێزلێنان و دابەشکردنی خەڵات و بەخشینی کتێبەکانی ڕێکدەخات.



1- ئایدیا: گۆڤارێكە گرنگی بە لێكۆڵینەوە و وەرگێرانی بابەتی فیكری و فەلسەفی دەدات، لەگەڵ هەر ژمارەیەكیشدا فایلێكی تایبەت لەسەر فەیلەسوف و بیرمەندێكی رۆژئاوایی بڵاودەكاتەوە.
2- ئایدیا دیبلۆماتیك: گۆڤارێكی سیاسیيە و گرنگی بە لێكۆڵینەوە و شرۆڤەكردنی سیاسەتی نێودەوڵەتی دەدات.
3- كوردستان دیبلۆماتیك: گۆڤارێكی سیاسیيە گرنگی بە لێكۆڵینەوە و شرۆڤەكردنی ئەو روداوانە دەدات، كە تایبەتن بەكورد لە هەر چوار پارچەی كوردستان، لەگەڵ وەرگێڕانی ئەو بابەتانەی دەربارەی دۆزی كورد دەنوسرێت بە زمانە جیاوازەكان.
4- باران: گۆڤارێكی ئەدەبییە و گرنگی بە لێكۆڵینەوەی ئەكادیمی، ئەدەبی جیهانیی و بەپلەی یەکەم ناوخۆیی دەدات، لەگەڵ هەر ژمارەیەكیشدا چەند فایلێك لەسەر شاعیر و نوسەرە كوردەكان، یان بیانییەكان بڵاودەكاتەوە، لەگەڵ بڵاوكردنەوەی شیعر و چیرۆك بە زمانی كوردی و وەرگێڕان لە زمانە بیانییەكانەوە.
5-فۆکەس: وەرزنامەیەکی تایبەتە و هەر ژمارەیەک فۆکەس لەسەر بابەتێکی تایبەت و گەرم و هەنووکەیی جیهان دەکات.
6- فاکت: گۆڤارێکی تایبەتە بە ڕەخنەی ئایینی و ئیسلامی سیاسی. گرنگی دەدات بە وەرگێڕان و لێکۆڵینەوەی ئەو بابەتانەی ڕەخنە لە هۆشیاریی ساختەی ئایینی دەگرن و بەرچاوی مرۆڤ ڕووندەکەنەوە.
7- پڕۆژەی چەمکە فکری و فەلسەفییەکان: پڕۆژەیەکی نوێی دەزگای ئایدیایە و خۆی لە زنجیرە کتێبێکی گەورەدا دەبینێتەوە، هەر کتێبێک تایبەتە بە چەمکێک، هەموو لایەنەکانی ئەو چەمکە دەخاتەڕوو و لە ڕەهەندە جیاوازەکانەوە پێناسەیەکی تێروتەسەلی لەسەر دەنووسرێت یان وەردەگێڕدرێت و ڕاڤە و شیکردنەوەی تەواوی بۆ دەکرێت.
8- پڕۆژەی (100) نامیلكەی فەلسەفی: پڕۆژەیەكی فكری فەلسەفەییە بەشێوەیەكی وەرزی (20) نامیلكە بڵاودەكاتەوە (80) لەوانە بڵاوكراوەتەوەو ئەوانی تریش پڕۆژەی داهاتووی دەزگاكەیە.
9- پڕۆژەی (100) نامیلكەی توێژینەوەی جیهانی: (100) نامیلكەی سیاسی ئابووریە و توێژینەوەی پسپۆڕان و شارەزایانی جیهانی و ناوچەیی و ناوخۆیین. گرنگی بەڕوداوگەلی گڵۆباڵ و ناوچەیی دەدات. 
10- پڕۆژەی كتێب: پڕۆژەیەكی هەمەلایەنی بواری سیاسی، فەلسەفی، فكری و بوارەكانی ترە، تا ئێستا نزیکەی (300) كتێب چاپكراوە.
11- پڕۆژەی (100) کتێبی ئەدەبی: پێکدێت لە 100 کتێب لەسەر 100 ئەدیب و نووسەری جیهانی. بۆ هەر یەکێکیان پێکدێت لە ناساندنێکی تەواوی ژیان و شیکردنەوە و خستنەڕووی دەق و لایەنە جۆربەجۆرەکانی ئەزموونی نووسینیان.
12- پڕۆژەی کتێبی گیرفان: زنجیرە کتێبێکی قەبارە مامناوەندە و هەر کتێبێکیان بۆ بابەتێکی فکری و سیاسیی هەستیار و گرنگ تەرخان دەکرێت.

بابەتەکانی گۆڤاری ئایدیا